[102] 健身單車及公開減肥的疑迷 (14-Jan-2012)

今日下午，老公買左個下午茶俾我食。

係<開花結果>的沙律雞脾+甘荀汁。

好味呀!

早前買的健身單車終於送到來喇!

送來係散件的，係由老公砌好呢! 

與早前向大姐夫借用個部相比，我呢部比較細D。 



踩上去，都好靜。

很適合我踩呢!

不過由我家大少試踩，好像有D格格不入。哈哈!

有中文簡易按鈕及顯示器。

亦有力度按鈕，通常剛開始時力度係2-3度，到兩星期後適應了，就可加至3-4度。

我個人認為4-5度已極限，不要太緊，因為太緊反而會令小腿變得更粗。

係時候講一講我減肥之道喇!

講真! 減肥真係好難好難，增肥真係非常之易!

其實我都無咩減肥之道，因為我覺得唔增肥已經很好!

不過我係剛過去的年尾，減左10多磅! 聽落係咪好勁呢! 其實係有原因的!

講番我既少少背景先，自從結婚後，就一直大飲大食，搞到重左成30磅! (超驚人數字!)

未嫁前，我記得媽咪話我帶飯的飯盒又細，D飯餸又少，就連貓狗食既份量仲多過我咁話!

但結婚後，我就一個大飯盒都不夠，仲要分開一盒飯加一盒餸，即係要兩大盒先夠我食! 

咁我身型就一日一日咁增加，體重都一樣啦!

到左年多前，因為我荷爾蒙失調，搞到我月經混亂及生左好多好多暗瘡，所以我就開始食有關既荷爾蒙藥! 

D暗瘡真係搞到我心情好DOWN! 洗面時感覺到自己塊面好似沙紙咁，凸凹不平!

我成日照鏡都好想打爆塊鏡! 心情大受影響! 總之就係慘痛經歷! 未試過既人係感受唔到的。

好彩而家已經算係好番好多，不過就留下好多印.....

由於我食有關既荷爾蒙藥，所以我既體重又再度增加，而且仲搞到成個人好水腫，總之就口腫面腫啦!

到上年九月尾，因為某D原因，我就停左藥，咁加上我答應了年尾結婚的好友會做她的姊妹，所以就開始減肥了!

開始減肥時，都係試下食少D，但係以咁喜歡食野既我，真係唔係一件容易既事!

有一天機緣巧合，大姐夫話借部健身單車俾我踩，咁我就開始踩了!

一開始時，踩10多分鐘已經想放棄，但都堅持要踩夠30分鐘!

如事者，兩星期後，我就可以加至45分鐘了!

之後，我係網上見有一個月健身會籍既超抵團購，所以我就JOIN左一個月玩下。

不過間健身公司非常之差，我指係每次都超硬銷的健身教練，真係煩到爆!

我已經表明我唔會JOIN入會，但每次都同我講一大輪，又會大大聲咁講D難聽既說話來令你尷尬，總之就係黑店啦!

我當然不會JOIN啦，間野咁衰，免費俾我都唔去呀! (真係一肚氣!)

一個月完左之後，我又係屋企踩番健身單車了。

而當時已經有多於7個人話我已經瘦左，起初老公同我講我都不信，但見其他人都咁講我就信了。

而且我上磅的磅數都低左。(開心)

但到左某一個磅數，就再減都無再低了。當時就無再刻意減了，亦到左做姊妹的日子了。

咁做完姊妹後，我亦要還番部車俾大姐夫，所以都無再做任何運動，再加上之前忍口忍得好辛苦，所以就無再忍口了，又再大飲大食了。

當我大飲大食時，有人仲問我係咪要增肥添! (其實我係因為之前忍口忍得太耐，所以要補償番!)

咁零運動又再大飲大食之下，我無再上磅了，其實係我自己唔敢想像會重番幾多，點知今日上磅的體重.......竟......然.......係無增無減! 

點解呢???? 我終於想到原因了!

我之所以減到十多磅，之後又無做運動又食番野而磅數又不變的原因係..................原來我呢段時間停食左有關既荷爾蒙藥!

原來呢D藥，會令人又肥又腫的! (我希望我以後都唔洗再食!)