自小就最驚睇牙醫..........簡直係恐怖呀!
所以就算去洗牙都好驚! 驚知道自己既牙有d 咩事!
星期六晚去左洗牙,牙醫話我有隻蛀牙! (oh no!)
唉! 我仲以為keep住每年都有洗牙實無事添,點知咁都衰左!
自問自己都已經早晚刷牙+
漱口啦! (無用牙線)
可能我喜歡食甜野,而且成日食唔停口,所以係好容易有蛀牙!
再加上因為隻智慧齒打橫生,所以係d食物好易隱藏係牙縫間。
長遠黎講,我都係要早d 解決脫智慧齒呢個大工程!
但好誠實咁同大家講,本人係非常之驚死! 少少痛都驚到不得了! 可能係心理壓力啦!
所以要係我知道既情況下脫牙,只得3個字可形容,就係"無可能"(國語)!
講番我d 牙先! 我有3隻智慧齒,分別係左下、右上及右下位置。
左下同右下都係打橫生,而右上就偏左向外生! 所以都要剝的!
咁我就諗,脫晒3隻咪好辛苦?? 實痛死啦! 會唔會有可以唔痛架??
就係只有全身將我麻醉左,咁我就可以係咩都唔知既情況下脫晒!
剝智慧齒都算係一個手術,因為要開刀,所以都有風險!
有人同我講,曾經有新聞話有人因為脫智慧齒而死左。(唔知係咪失血致死或係其他原因啦)
聽到我都驚! 但係我都要面對! 早D解決早D安心!
咁我就問朋友那裡剝智慧齒好,咁都有好幾個朋友回覆我,有些真的很貴呀!
一隻成2千幾3千蚊,咁我3隻咪好誇?
點知有個舊同事介紹我,係西環有間牙科醫院,平日朝早有限額收症,價錢好平! (登記費每次$45)
點解咁平? 係因為專收合乎醫院俾港大實習醫生作教學用途(做白老鼠?)的症,醫院係有可能會唔收症的。(要睇合唔合適)
而且要一早去排隊輪籌,因為得好少額位,真係好似去排演唱會飛咁,而且我住係新界區,真的很遠喔!
咁我今早就單身隻影起程出發,由於心情好緊張,所以昨晚成日醒,我諗我只係訓得3至4個鐘頭。
5:05AM 起床。
5:30AM 出門口。
5:40AM 坐頭班巴士去葵芳地鐵站。
6:00AM 到達葵芳地鐵站,不過未入得閘。 咁我就去OK買定個早餐(三文治+豆漿)$23.5。
6:05AM 入閘坐頭班車到荔景站,係荔景站等左一陣。
6:18AM
荔景站轉車到香港站。
6:29AM
到達香港站,出閘搵的士搭。
6:40AM 到達菲臘牙科醫院。
好彩已經開放左等候室,咁就可以坐係度排隊。
我係排第12個。 好彩早d 黎到,因為如果我遲多10分鐘就會無晒上午位了。
成人上午位得16個,而下午位得8個,上下午都係朝早排隊的,萬一我攞的係下午位,我就真係慘了,真好彩!
見有排等,我就開始食我的早餐了。
等。
等。
等。
8:05AM 終於有姑娘出現喇,姑娘就開始講解及收聲明書。
8:15AM 姑娘終於派籌喇,好野! 手持12號籌。
8:30AM 開始由1號籌開始叫,做登記及交費用($45)。
9:00AM 開始由1號籌開始叫,入診症室檢查牙齒。(不過當時仍未叫到12號籌做登記喔!)
9:15AM 到我做登記及交費用了。
做完登記及交費後,知道有排等,咁就問職員附近有無7-11或OK,他說隔兩個街口對面有間7-11,咁我就去7-11買本雜誌來看。
( 題外話 : 呢條斜坡真係好斜呀! )
等。
等。
等。
10:20AM 終於叫我名,入診症室檢查牙齒,入房見有2個女醫生(唔知係咪2個都係醫生呢?),咁其中一個醫生就問我有咩牙齒問題,之後就開始檢查牙齒,而且仲會吉下我D牙肉,雖然有少少痛,不過都好彩頂得住!
好快咁檢查完之後,就叫我去照X-RAY,照完再返來。
10:30AM 等照X-RAY,姑娘話要除下頸鏈手鏈耳環等飾物。我一早知道實要照X-RAY,所以前一日已經除低晒,連手錶都唔戴。
10:45AM 叫我入房照X-RAY,要咬實膠片照,膠片印到我D牙肉好痛,我要忍住,唔洗一分鐘就照完兩邊牙。跟住仲要入另一間房照張360度牙照,不過過程唔痛,而且都好快搞掂。
照完等左一陣,點知又叫我名,話由於左邊照得唔清楚,所以左邊要照多次.........唔係掛 =_="
終於照完,就去番診症室等叫名。
等。
等。
等。
11:20AM 叫我名喇! 好緊張呀! 因為我驚會唔收我! 幸好係有收我的,醫生話有3隻智慧齒要剝,但有1隻蛀牙就要我自己出去補,可以剝前剝後補都得。
咁就俾左張紙我,話要等大約2-6星期左右,到時會有電話通知我來見專科醫生,但只係見醫生,未剝得住,要醫生同你講解分析後先。
11:30AM
咁我就可以走得了。
知道今朝行程無白費,真係好安慰,希望我會快D收到電話通知,最緊要一切都順順利利,咁我就安落晒,可以了結人生其中的一大事。
11:50AM 搭紅色小巴去葵芳。
12:10AM 好快就到左葵芳了。
為勞自己今朝既辛苦,我就去左元氣食壽司,氹番自己開心!
食完就回家,回到家已經1點多了,呢個時侯,唔知點解,我覺得我回到家係最有安全感! (應該係我實在太驚了剝牙了!)
到了晚上,未夠10點,我已經有WING下WING下的感覺,原因係我實在太累了,加上前一晚無覺好訓。
但係我都成12點先訓,老公開左冷氣俾我,等我舒服D訓,無幾耐我就訓了。(難得的一晚無失眠) zzzzZZZ
記住多問醫生的專業意見,唔駛驚慌呀!
回覆刪除